“Prezident İlham Əliyevin beyin məhsulu olan “ASAN Xidmət” modelinin bir sıra avropa və asiya ölkələri ilə yanaşı, Afrikada qurulması üçün konseptual dəstək göstərilir”.

“Qafqazinfo” xəbər verir ki, bu fikirləri Milli Məclisin deputatı Kamal Cəfərov bildirib.

Millət vəkili qeyd edib ki, bir neçə gün öncə Uqandada “ASAN Xidmət” modeli əsasında ilk xidmət mərkəzinin açılışı oldu: “Tanzaniya və Efiyopiyanın müraciəti əsasında həmin ölkələrə səfər edilib, “ASAN Xidmət” modelinin həmin ölkələrdə də qurulması üçün məhsuldar müzakirələr aparılıb.  Nəzərə alsaq ki, “ASAN Xidmət” ictimai idarəçilik və sivil həyat tərzinin ən yüksək mərhələsidir, Prezident İlham Əliyev “ASAN Xidmət” konsepsiyası ilə yanaşı həm də asana məxsus müasir idarəetmə vərdişlərini, bilikləri və innovasiyaları ixrac edir. O, regionun stabil inkişafı üçün bütün təşəbbüsləri dəstəkləyir.

Belə ki, İlham Əliyev təkcə “ASAN Xidmət” modeli ilə deyil, həm də Qoşulmama Hərəkatına sədrlik edən qlobal lider kimi müstəmləkəçilik və irqi ayrı-seçkiliyə məruz qalan ölkələrə ən ali beynəlxalq tribunada açıq dəstək verir”.

K.Cəfərov Qoşulmama Hərəkatının Əlaqələndirmə Bürosunun Bakıda keçirilən nazirlər görüşündə Prezident İlham Əliyevin Fransanın müstəmləkə və irqi ayrı-seçkilik siyasətini sərt tənqid etməsinə diqqt çəkib: “ O, Fransanı öz müstəmləkə keçmişinə, qanlı müstəmləkə cinayətlərinə və soyqırımı aktlarına görə Qoşulmama Hərəkatına üzv olan Afrika, Cənub-Şərqi Asiya ölkələrindən və digər ölkələrdən üzr istəməyə çağırdı. Daha sonra məhz bu görüşdə Fransa müstəmləkəçiliyinə qarşı Bakı Təşəbbüs Qrupunun yaradılması barədə razılıq əldə olundu. Fransa kimi ölkələr öz əhali sayından dəfələrlə artıq COVİD peyvəndləri yığanda, vaksin millətçiliyi edəndə, Azərbaycan 80-dən çox ölkəyə COVID-19 ilə bağlı maliyyə və humanitar dəstək göstərib, Afrika ölkələri daxil olmaqla beş ölkəni peyvəndlə təmin edib”.

Millət vəkilinin sözlərinə görə, İlham Əliyev xüsusilə Afrika və inkişaf etməkdə olan kiçik ada dövlətlərinə postpandemiya dövründə bərpanı dəstəkləmək üçün iki qlobal çağırış elan etdi və Azərbaycan ilk donor kimi hər iki çağırış üçün bir milyon ABŞ dolları ayırdı: “ Digər tərəfdən isə Fransa Prezidenti Makron tarixdə təkcə daxildə həyata keçirdiyi uğursuz siyasəti ilə deyil, həm də xarici siyasətdə neokolonializmi ilə yadda qalır. Nigerdə baş verən hadisələr Fransanın Afrika qitəsində həyata keçirdiyi müstəmləkəçiliyin daha dəqiq desək köləliyin və acgöz istismarın nəticələridir. Bu gün Nigerdə çevriliş edən qüvvələr Fransadan istismara son qoymağı və hərbi qoşunlarını ölkədən çıxarmağı tələb edir. Buna cavab olaraq Makron bildirib ki, Nigerdəki maraqlarına qarşı hər hansı hücuma dözməyəcək, Parisin “dərhal və qətiyyətlə” cavab verəcəyini bildirib. Bundan sonra, minlərlə insan etiraza çıxıb, “Fransanın Nigerdəki səfirliyi” yazılmış lövhəni cırıb, yerinə Niger bayrağını taxıblar. Bunun ardınca çərşənbə günü Fransa Nigerin hava məkanını pozub, hərbi düşərgəyə hücum edib və ölkədə sabitliyi pozmaq üçün daha geniş planın bir hissəsi kimi "terrorçuları" azad edib”.

“Niger nüvə enerjisi üçün ən çox istifadə olunan uran istehsalına görə dünyanın yeddinci ən böyük istehsalçısıdır. Niger, həmçinin gündə 20,000 barel neft hasil edir. Məhz Fransa vəhşi istismarına görə 25 milyon xalqı səfalət içində yaşayır. Makronun isterikaya düşməsinin səbəbi də məhz həmin uran yataqlarının itirilməsi təhlükəsidir.

Son günlərdə baş verən hadisələrdə isə bir kontrast çox aydın görünür. Makron Nigeri işğal etmək, istismara davam etmək, xalqını və irsini məhv etmək istəyir, Prezident İlham Əliyev isə Afrikaya mənəvi güc verir, “ASAN Xidmət” modeli ixrac edir, bir sözlə regionun rifahı üçün təşəbbüs göstərir və bütün səyləri dəstəkləyir.

Bütün bunların fonunda isə erməni mediasında təzə bir xəbər çıxır. 15 gündür “humanitar yük” adı ilə Laçın sərhəd-keçid məntəqəsinin qarşısındakı ərazidə gözləyən yük maşınlarına biri də qoşulub. Fransanın bir sıra şəhər və rayonları tərəfindən 20 tondan çox ərzaq və makaron daşıyan tır da həmin karvana qoşulub. Bu isə Azərbaycana qarşı başlanılan “humanitar yardım” şousunun arxasındakı gücün Fransa olmasının daha dolğun şəkildə üzə çıxarır”.

Deputat əlavə edib ki, bu məsələdə bizim mövqeyimiz aydın və qətidir: “Yüklər yalnız təklif etdiyimiz Ağdam-Xankəndi yolu vasitəsilə daşına bilər:

"Digər tərəfdən nə Fransa, nə də Makron Azərbaycanı başqa ölkələrlə səhv salmasın. Azərbaycan xalqı çox yaxşı bilir ki, Fransanın çıxardığı qərarlar saxta, beynəlxalq təşkilatlarda lobbiçilik edərək qəbul elətdirdikləri qətnamələr kağız parçası, beynəlxalq mediada dərc etdikləri xəbərlər feykdir.  Və bizi heç bir təzyiq yolumuzdan döndərə bilməz. Qarşılarında 32 il bundan əvvəlki Azərbaycan deyil. Bu gün Azərbaycan tarixdə olmadığı qədər güclü və müstəqildir. Bu gün Azərbaycanın İlham Əliyev kimi müzəffər lideri və müdrik xalqı var. Fransanın timsalında Qafqazda sülh istəməyənlər əmin olsunlar ki, bütün təxribatlara, Laçın sərhəd-keçid məntəqəsində göstərilən "humanitar" şouya və hələ bilmədiyimiz çətinliklərə baxmayaraq, Qafqazda real sülhə məhz İlham Əliyev nail olacaq”.

Məqaləni dərc edən xəbər saytları:

1. https://qafqazinfo.az/news/detail/ilham-eliyev-afrikaya-rifah-makron-ise-muharibe-ixrac-edir-408958

2. https://www.musavat.com/news/ilham-eliyev-afrikaya-rifah-makron-ise-muharibe-ixrac-edir-deputatin-yazisi_997367.html

3. https://oxu.az/politics/763454

4. https://azpolitika.info/?p=724256